उत्तरदायित्व फाउंडेशन ही संस्था सार्वजनिक विश्वस्त संस्था अधिनियम 1950 अंतर्गत नोंदणीकृत संस्था आहे. भारतीय संविधानातील विचार आणि मूल्ये यांना प्रमाण माणून संस्था कार्यरत आहे . महात्मा जोतिबा फुले, राजर्षी शाहू महाराज व डॉ. बाबासाहेब आंबेडकर इत्यादी महापुरुषांच्या विचार व कार्याचा आदर्श ठेवून ‘उत्तरदायित्व फाउंडेशन’ वाटचाल करीत आहे. प्रामुख्याने प्रबोधन व रचनात्मक स्वरूपाचे काम करण्यावर संस्थेचा भर आहे. अहिंसा हे मूल्य संस्थेसाठी शिरोधार्य आहे. संस्थेची भूमिका जात,धर्म,वर्ण व लिंगनिरपेक्ष असून विद्यार्थी, युवक,महिला व समाजातील वंचित व असंघटित घटकांच्या उन्नतीसाठी सनदशीर मार्गाने संस्था काम करीत आहे.
                समाजातील विद्यार्थी, युवक, महिला व वंचित घटकांपर्यंत शासनाच्या विविध कल्याणकारी योजना पोहोचवण्याचे माध्यम म्हणून देखील ‘ उत्तरदायित्व फाउंडेशन ‘ काम करीत आहे. सदरहू योजनांचे लाभ संबंधित घटकांपर्यंत पोहोचवण्यासाठी प्रसंगी प्रसारमाध्यमे विविध पातळ्यांवरील लोकप्रतिनिधी याद्वारे न्याय मार्गाने फाउंडेशन पाठपुरावा करीत आहे. दलित, आदिवासी, ओबीसी, बहुजन तसेच खुल्या गटातील आर्थिक कमकुवत विद्यार्थ्यांसाठीच्या विविध योजना, अंधश्रद्धा निर्मूलन, जातीय- धार्मिक सलोखा, वैज्ञानिक दृष्टिकोनाचा प्रसार याबाबत संस्था आग्रहपूर्वक काम करीत आहे.
                देश -विदेशातील सर्व प्रकारच्या शिक्षणाच्या व करिअरच्या संधी, सरकारी हॉस्टेलची माहिती विद्यार्थी व युवकांपर्यंत पोहोचवणे ह्या कामाला ‘उत्तरदायित्व फाउंडेशन’ सर्वोच्च प्राधान्य देते.